港足
最近睇報章，港足新聞佔到不少篇幅，總算係一件值安慰的事。我記得我第接觸香港足球時，精工已經成為一個過去的傳奇，我睇的時候，係南愉的天下，無記錯，南華係用陳發枝拍巴貝利作箭頭，愉園就有"陰毒仁"梁能仁，梁帥榮鎮守後防。由於家父係南華fans，所以好順理成章，我都成為擁南一族。
作為南華fans，好習慣見到球隊橫掃香港球壇，所以之後東方皇朝的出現，每次對南華都輕取三、四蛋，感覺很難受，好似天國墮落地獄一樣，不過後來都漸漸都睇化，接受到南華唔再係球壇一哥的事實。再之後，就進入群雄割據的局面，快譯通好易通的加入，令到球壇已經再無一面倒的情況出現。
至於現場觀戰，多數都係睇賀歲盃為主，最記得當時去舊大球場，睇布拉加斯巴達對莫斯科斯巴達，相信有睇過的都記這場高質素的對賽，多年之後仍然為人津津樂道。至於球會級賽事，反而係比較後期，第一次入場支持南華，係小西灣球場新開不久，睇南華對星島，亦終於感受到球迷的威力，因為之前賀歲盃，全場都一面倒捧主隊，相安無事，但今次睇聯賽就不可同日而言，我剛巧坐在反南份子那邊，那幾位"中坑"，全場粗口侍候，差不多南華所有球員的祖宗十八代都波及到，令到我都相當懼怕，連南華入波都不敢歡呼。
其後，接觸較多高水準外國足球，加上港足假波事件，令我覺得"受騙"而心灰意冷，曾謝絕了好一段時間的香港足球，係後來見到港足球員總算知恥近乎勇，開始比較有心作賽，先重新入場支持，但都只限於國際賽賽事，對球會級真的提不起勁了。
posted by G13 @ 11:53 AM
0 comments
0 Comments:
Post a Comment
<< Home