G13 Mania

歐聯十六強 Day 2

所謂4-5-1，實際係4-6-0。朗尼基本上經常性走返中場，前面無一個目標人物，而且中場雖然人多，但係稍有創造力的傑斯及史高斯都無態，最有威脅就係朗拿度，全場僅有幾次有威脅的反擊都係由佢策動，不過偏偏俾人換走0個個又係佢，結果米蘭可以肆無忌憚進攻，再加上曼聯搵左個計時炸彈守龍門，而佢又咁0岩揀正今日爆炸....上年有侯活，今年會唔會係卡奴爾玩死曼聯呢 ??

又引證左無論幾強的球隊都好，都起碼需要有一個好的高大中鋒。巴塞面對車路士的死守，換入「阿根廷坦克」麥斯盧比斯，此子身型高大，而且睇佢幾球同人鬥爭位，body balance 好強，加左佢落場，巴塞攻勢即刻生猛晒，除左入波，仲可以做到禁區內"得"位回傳俾隊友後上射門，呢一招自從拿臣受傷好耐都無見過。不過，佢真係要再同隊友操下默契先得，有好幾次都唔識得走位，要朗拿甸奴同迪高指佢先識走。

仲有，巴塞雖然好睇，但效率真係認真麻麻，全場起腳34次，入得兩球，佢地都唔係第一次，好多時聯賽都係有壓倒性的射門次數，但係入球率就好低，要檢討一下先得。

講起效率，仲有一場怪波，雲達不萊梅主場對里昂，全場佔優，攻勢又多，最後竟然俾里昂數三粒，莫非全個德國真係剩係得拜仁識打歐聯 ??

posted by G13 @ 3:42 PM     1 comments