G13 Mania

內憂外患

今日東方日報及太陽日報，均大字標題報導，前中共總書記趙紫陽因肺炎導致心臟衰竭，已經於08/01與世長辭，至於點解直到現時為止國內媒體都未有提及，主要係因為會中共對於如何評價紫陽同志的生平仍然未有定案，而評定紫陽生前的功過，少不免會牽涉到中共一個傷口 -- 「六四事件」。

究竟紫陽同志是否已經辭世，仍然未有証實，但相信就算在生，都必定已經惡疾纏身，所以現在放風測試一下國內外反應，都係時候。一直以來，不少有影響力的幹部或者學者，都從不同渠道表達意見，覺得應該還紫陽同志一個公平公正的定論，但係問題一去到六四呢個範圍，就會變得好復雜，一個唔小心，可能會嚇親唔少因為六四事件而成為權力核心的人的神經，所謂牽一髮而動全身，核心各人關係千絲萬縷，所帶來的震動分分鐘比得上南亞海嘯，而一直睇住北大人面色做人的香港都可能無好日子過。仲有，八九年的民運，源自胡耀邦同志之死，前車可鑑，同樣係深得人心的趙紫陽同志若果得唔到一個令普羅大眾接受滿意的結論，有可能會引起另一次民運潮，而且而家中國比起八九年開放、亦開始同國際舞台接軌，若果又引起天怒人怨，所受的外來壓力亦會比當年大好多。

加上，中國0係胡主席帶領下，頻頻攪小動作，先有同亞洲另一巨頭日本抬槓，然後再來一個「反國家分裂法」，明正言順同台灣硬著來。要同台灣硬來，就必須要睇布殊政府的面色，而美國一直都因為六四呢件事死啄住中國，亦都好關注趙同志的安危，佢地對趙紫陽呢份情究竟係真心真意抑或係假鳳虛凰大家都無從稽考，但係若果中國唔俾面，個評價做得好離譜，美國佬點都會指指點點0既....又內憂又外患，班高層都有排煩喇。

除左一班高層食唔安坐唔樂之外，0係趙紫陽馬房出生的溫總理最近都應該有點「頭暈身興」，一直有傳自從胡主席集軍政大權於一身後，開始回復強硬手段，同溫總理較為親民的理念大相逕庭，早前佢探訪曠工時一句「我來遲了」竟不約而同同當年趙紫陽探訪天安門學生時的「我們來遲了」同出一轍，有人炒作溫總講呢句說話係暗示自己都「前途似咁」，加上佢本身又帶有「趙氏」血統，若果最終中共對趙紫陽同志有負面評價，溫總都應該有排頭痕......

丫，話時話，早排中國同香港個巿無乜風吹草動下都跌咁多，唔知同呢件事又有無關呢??

posted by G13 @ 2:05 PM     1 comments