效率再勝藝術
皇馬班大帝情緒病又發作，全隊攻又唔係守又唔係，完全無左上一個回合的投入感，所以一開始無耐，就俾祖記佔到優勢。卡比路可能眼見皇馬後防不擅頂，於是頻頻利用森保達同今場大勇的甘莫蘭尼斯在邊線快放，再以伊巴同"椰撻"的高空攻勢令到皇馬後防風聲鶴唳，上半場數次俾佢地用頭球set波俾隊友施射，可惜成隊就係爭一個射術可靠0既去執行最後任務 -- 入球，上半場兩隊互交白卷。
好喇，下半場成隊射術最好0個個出0黎喇--講緊0既係"李澤楷"，佢入替左迪比亞路，前面三支高塔，更加單純以高空轟炸作攻擊。皇天不負有心人，終於就由伊巴頭槌回傳、"李澤楷"勾射入網追成總比數1-1，令比賽進入加時階段。
去到加時，皇馬一度由後備的蘇拿利於左路替主隊製造不少麻煩，好彩今場一對好sharp的中堅簡拿華路及杜林總算可以守穩城池，兩隊開始呈膠著狀態。
有時0的野唔到你唔信邪，同一個人、同一個時間、同樣係對住西班牙球隊，呢個"椰撻"當年射死左巴塞，今年又0係同一時間，一腳射走另一支西班牙球隊，成為功臣，最終祖記就以總成績2-1晉級，而西班牙球會歐聯之旅亦正式宣告全軍覆沒。
今場勝負分野，我覺得好大程度係教練的調度能力。卡比路見上半場球隊在高空方面佔優，亦組織到久數次入球機會，可惜無論伊巴謙莫域抑或是迪比亞路，他們的射術認真不敢恭維，所以下半場決斷地以把握能力較強的查斯古特，入替比較會拖慢球隊節奏的迪比亞路，最後證實是一個妙著。
那邊廂，盧森保高換入於聯賽有好表現的古迪屬正常，但我認為不應調走控制比賽節奏的施丹，反而應該收起一個前鋒，因為當時比賽接近尾聲，祖記越攻越急，若果收起施丹，場上失去一個舵手，令到球隊很容易被對手牽著鼻子走，失去方寸，而不知是天意抑或巧合，就在施丹下場後不久，祖記就追回1-1平手。
若要選今場最佳球員，我會選祖記的甘莫蘭尼斯，此子在卡比路手下不單重拾當年維羅納的水準，更可說是更上一層樓，無論攻守平衡及效率都有很高水平，他是全隊聯賽中的首席助攻手，而今場雖面對著卡路士，都多次成功底線傳中構成威脅 ; 不單在攻，在守也很出色，就是他堵塞了卡路士數次助攻，亦不時回防協助追纏對手，表現可人。
posted by G13 @ 11:01 AM
0 comments
0 Comments:
Post a Comment
<< Home