王朝酒業
終於得閒望望隻王朝酒業(0828)係乜野料。睇報導，佢係國內第二大葡萄酒商，老大係張裕，老三就係長城，咁基本上個餅就係俾佢地霸晒，暫時無乜來路貨有本錢同牙力去同佢地爭地盤。咁究竟葡萄酒生意0係國內有無作為呢 ? 跟據我從國內特派專員--即係我國內的親戚--觀察所得，似乎環境唔錯。首先介紹一下，佢地都算搵到下錢，我諗應該算係中產喇，不過副咀面就好鬼暴發戶，只要加多副茶色眼鏡、手上戴幾條兼頸上圍多一條粗金鍊的話，就夠晒入型入格。有一次佢地0黎探親，我地諗住盡地主之誼，請佢地食飯，仲記得幾年前的請客經驗，特登預備一支白蘭地，點知佢地又洒手又擰頭，而家與飲紅酒，飲白蘭地有失身份喎，因為之前有專家話每日一小杯紅酒可以健康又長壽，而且飲紅酒令到個人睇起上0黎西化0的，無咁鄉土氣息，所以上面好多人都轉飲紅酒，一時之間點搵支紅酒呢? 唯有硬著頭皮，拎一支03年、仲要係雜嘜牌子的紅酒，諗住實俾佢地笑餐勁，點知估計錯誤，不知飲得幾開心，原來唔係真係識飲0既，只係人飲佢又飲0者....由此可見，一般紅酒已經可以滿足到，仲未去到揀酒飲的階段，似乎巿場仲係發展緊，大有可為喎。
近期個巿比較淡靜，應該唔會好似上年咁，乜鬼新股都爆額，少左好多人爭就應該唔會申請十幾手剩係派得一手，加上招股價又唔係貴($1.75 ~ $2.25)，巿盈率都係16倍幾，好過其他酒類股，都值得入返幾手短炒下喎。
喂...咪住...截止日期 : 20/01 中午 12:00.......今日係21號喎，下，即係截左止喇傻佬 !! 咁點算呀 ? 等上巿0個日買囉，但係我又唔想高追喎，一陣唔覺意坐艇唔走得，然後好衰唔衰爆單假酒新聞出0黎，咪邊度都唔駛去 ??
後記:
起初，純粹係想寫財經分析，點知寫下寫下先發覺自己戇居左，所以篇野都跟住變質....不過咁，好多時標明「純粹」的東西都唔會真係「純粹」咁簡單，「純粹數學」咪又係有應用理論、0的人話「純粹八掛下」咪又係有所企圖、「純粹粗房」咪又係唔止租房亦有埋特別服務......
posted by G13 @ 10:58 PM
0 comments
0 Comments:
Post a Comment
<< Home