過得去
今晚同曾經鐘意左九年零三個月加多七日的舊同學暨前度女神食飯，本來可以係幾風光明媚的一件事，假如女方右手無名指唔係戴住一隻結婚介指兼左手拖住一個我識得、叫做"老公"或"丈夫"或"HONEY"或"傻豬"的物體的話，我諗會更加明媚。除左提返以前讀書時代大家的傻事外，又會講下大家近況未來展望等等，對比之下發覺呢個曾經話如果我可以由尖沙咀背住佢返美孚就會做我女朋友又曾經左右開弓摑過我的野蠻丫頭，而家已經進化成一個強化版、識得體貼識得家頭細務識得關心人識得收歛脾氣的野蠻丫頭，而我自己仍然係一事無成吊兒郎當偶而想抓狂大叫的黃毛小子。
呢個野蠻丫頭雖然經過強化，但不失佢以往吸引人的那份率直個性，以前就係因為佢夠直夠爽朗，好多人(包括我)都特別喜歡同佢傾計同佢親近，經過社會大學的磨練及歲月的洗禮，佢呢一份性格仍然在，依然令我好鐘意同佢分享我的感受，只要佢唔好好似今晚咁坦率清晰表明當年唔選擇我而選擇現任老公係一個正確選擇，我諗我會更加喜歡，雖則如果我係女性我都會揀一個有事業基礎有穩定收入有樓，多過搵一個一事無成無樓0係手的一個合約小員工，畢竟有情除左飲水都仲要食埋飯先夠飽。
話就話三個人食飯，佢地兩位就真係玩得高興，新婚係唔同0的，一句說話一個眼神已經笑得好歡暢，作為一個外人實在唔能夠體會佢地當中有趣奧妙的地方，唯有專注面前那塊話五成實際起碼八成的牛扒，突然一份被排擠被冷落的寂寞感覺一下子湧上心頭，即刻無晒興緻，快手食完餐飯就返屋企。
「熱鬧的深夜一個歸家，此刻終於不必說話」，又係行返呢條路，跟據電影情節，"男主角應該好落泊，雙手插袋好孤獨咁行，迎面吹來冷風，然後就會見到有一對溫馨的情侶行過，男主角因而觸景傷情"。可惜成本唔夠，情侶就無喇，改為一隻癩皮生癬的雄狗同一隻母狗旁若無人在追逐交配，完全唔理我行過，份感覺好熟悉...咪就係同頭先食飯差唔多，佢地有佢地玩手指玩鋸扒我有我做自己野，我唔係暗示人地係狗，但係0個種身處局中，明明大家相處0係一個觸手可及的距離不過精神上溝通上好似隔住兩個山頭咁0既不協調感覺，真係令我有點欲哭無淚。
野蠻丫頭曾經安慰過我，話「還過得去，還得過去，還得用過得去的心情過去」，以前讀書無錢無情趣，空有一身熱情搵唔到伴侶，到後來有錢有無情趣無熱情仍然係搵唔到伴侶，到而家少左錢無熱情識多左少少乜野係情趣亦係無伴侶，跟住發覺原來除左錢情趣熱情女人外，仲有0的野叫家庭叫學問，原來一個男人唔能夠咁短視，望任一0的遠野而忽略左其實身邊仲有好多貴重事物有待我去發掘，既然其他方面未搵到快樂，試下轉去第二個方向搵下，或者柳暗花明又一村呢，死鑽牛角尖都唔係辦法架。
posted by G13 @ 10:45 PM
10 comments
10 Comments:
＞＞坦率清晰表明當年唔選擇我
唔．．我諗，有時說話駛唔駛講得咁清楚呀？（頂，我會起身走...)
＞＞"柳暗花明又一村"
我好認同這一句．努力d, 找個仲好d．：－）
哈，我都會起身走...如果我無鐘意過佢的話....
雖然我唔係男人, 但係都係o個句:心有戚戚然~
唔知戚乜鬼o野...
鞋~~
「坦率清晰表明當年唔選擇我而選擇現任老公係一個正確選擇」﹖咁樣既飯局﹐背脊骨落呀﹗
Sidekick: 當時我都唔知俾乜野反應好，我覺得我應該要大方0的，但係個心又真係"un"住"un"住...
Stannum: 唯有逼自己諗住"人地tum老公0者"，總算捱得住
俾我就唔會去食這餐飯 ...
ArchBoss: 哈，呢0的咪就係叫犯賤囉，明知會唔開心，但係又想見下人.....
和她也是同學，也曾感受過你這體驗，我和她也食過這樣的飯局。一是我結婚請過佢飲；二是她準備結婚找過我食飯。世事奇妙得很，她今天竟然是是我親愛的太太，兩個小孩母親。（若然你看過我的自白，知我是比較幸運的一個吧）
Popeye: 嘩，一個好奇妙的奇遇呀!! 不過我諗唔會發生0係我身上喇...
you never know what happen next !!!
Post a Comment
<< Home